Авыл хуҗалыгы терлекләре исәпкә куелырга тиеш

Ни өчен бу кирәк?
Төп сәбәп — куркыныч йогышлы авыруларның таралуына юл куймау. Күп очракта чит төбәкләрдән китерелгән терлекләр авыру чыганагына әйләнә. Исәпкә алу системасы ветеринария хезмәтенә вакциналарны төгәл исәпләп заказ бирергә һәм, бәла-каза килсә, хуҗаларга дәүләт тарафыннан компенсация түләргә мөмкинлек бирә. Әгәр хайван исәптә юк икән, закон буенча бернинди түләү дә каралмаган.

Кагыйдәләр нинди?
2022 елда кабул ителгән Федераль закон нигезендә, 2024 елның 1 мартыннан авыл хуҗалыгы терлекләрен маркировкалау һәм «Хорриот» дәүләт системасына кертү мәҗбүри. Бу эшне башкару өчен үзегез яшәгән районның ветеринария хезмәтенә мөрәҗәгать итәргә кирәк.

Кемнәргә маркировка ясарга кирәк?
Тимергали Гани улы ачыклык керткәнчә, барлык хуҗалыклар да бу таләп астына эләкми:

Кош-корт: Әгәр хуҗалыкта 10 баштан артык кош булса, аларны теркәү мәҗбүри. Әгәр саны 10нан ким икән, ашыгырга кирәкми — моны 2029 елга кадәр эшләргә мөмкин.

Сату белән шөгыльләнүчеләр: Чебеш чыгарып сатучылар өчен маркировкалау һәрвакыт мәҗбүри.

Йомырка өчен асрау: Әгәр хуҗалыкта 10 тавык һәм бер әтәч кенә булса, аларны теркәргә кирәкми. Әмма кошлар саны 10нан артса яки алар нәсел үрчетү өчен асралса, маркировкалау таләп ителә.

Эш ничек башкарыла?
Ветеринарлар йорт саен йөреп, мөгезле эре терлекләрне, кош-кортны һәм умарталарны исәпкә алачак. Һәр хайванга яки кош төркеменә махсус бирка беркетеләчәк (бер бирканың бәясе — 100 сум).

Тимергали Рамазанов билгеләп үткәнчә, искечә журналлар белән эшләү чоры тәмамлана. Хәзер барлык мәгълүматлар электрон базага кертелә, бу исә ветеринария хезмәтенең эшен заманча һәм нәтиҗәле итә.

Аида Хәйртдинова язып алды.