Эльвира Аеткулова “Белоснежка” балалар бакчасының эшчәнлеге белән танышты

Иске Балтачтагы “Белоснежка” балалар бакчасында тәрбияләнүчеләр кечкенәдән үк берничә телдә аралашу мөмкинлегенә ия. Биредә 2025нче елда полилингваль төркем эшли башлады. Бүген анда тәрбияләнүчеләр рус, башкорт һәм инглиз телләрен өйрәнә.

Эш сәфәре барышында Бөтендөнья башкортлары Корылтае Президиумы рәисе, Дәүләт Думасы депутаты Эльвира Аеткулова һәм район Хакимияте башлыгы Илгиз Субушев әлеге төркемнең эшчәнлеге белән танышты. Кунакларга балаларның телләрне өйрәнүе, иҗади үсеше һәм милли мәдәният белән танышуы турында сөйләделәр.

Әлеге юнәлештә балалар бакчасына күрсәтелгән ярдәм дә үз нәтиҗәсен бирә. Күптән түгел республика Башлыгы грантын гамәлгә ашыру кысаларында Бөтендөнья башкортлары Корылтае «Белоснежка» балалар бакчасына “Җанлы сүз” дип аталган уку-укыту комплекты бүләк иткән. 5–7 яшьлек балалар белән дәресләр үткәрү өчен әзерләнгән әлеге кулланмалар ачык төсләре һәм мавыктыргыч эчтәлеге белән игътибарны җәлеп итә. Алар тәрбиячеләргә уен формасында балаларда туган башкорт теленә һәм милли мәдәнияткә кызыксыну уятырга ярдәм итәчәк.

Балалар бакчасы мөдире Чулпан Сабирова кунакларга әлеге уку-укыту комплектын да күрсәтте. Ул аның балалар белән эшләүдә мөмкинлекләрен билгеләп, күрсәтелгән ярдәм өчен Эльвира Аеткуловага рәхмәтен белдерде.

Кунаклар алдында балаларның иҗади сәләтләрен күрсәтү мөмкинлеге дә булды. “Хомай” район конкурсында җиңү яулаган Регина Гыймранова үз чыгышын тәкъдим итте. Ә “Урал батыр” эпосын башкаручылар конкурсының зона этабында өченче урынга лаек булган Аслан Мусин да үзенең осталыгын күрсәтте. Аларның чыгышлары балалар бакчасында милли мәдәнияткә һәм халык авыз иҗатына игътибарның зур булуын дәлилләде.

Чулпан Сабирова кунакларны шулай ук балалар бакчасының эшчәнлеге белән таныштырды, тәрбия һәм белем бирү юнәлешләре, балалар өчен булдырылган шартлар турында сөйләде. «Белоснежка»да балаларның сәләтләрен ачуга, телләр өйрәнүгә һәм милли кыйммәтләрне үзләштерүгә игътибар бирелә.

Бүген күптелле белем бирү — заман таләбе генә түгел, балаларның киләчәгенә салынган мөһим нигез дә. Иске Балтачтагы “Белоснежка” бакчасында бу эшнең мәктәпкәчә яшьтән башлануы балаларга телләр дөньясына беренче адымнарын кызыклы һәм табигый шартларда ясарга мөмкинлек бирә.