Бакчагызда повилика (кычыткан үләне) бармы?

Ни өчен аның белән көрәшергә кыен?

Озак саклану: Повилика орлыклары туфракта 6-10 елга кадәр шыту сәләтен югалтмый.

Тиз таралу: Хәтта өлгереп җитмәгән орлыклар да шыта ала. Сабагының кечкенә генә кисәге дә яңа үсемлеккә әйләнергә сәләтле.

Көрәш һәм профилактика чаралары

 Профилактика — иң мөһим адым

Чәчү һәм утырту материалын җентекләп тикшерегез.

Билгесез чыгышлы печән, грунт яки тирес кертмәгез — аларда еш кына паразит орлыклары була.

Участокны һәм аның тирә-ягын даими карап торыгыз, чүп үләннәрен вакытында утап, чистартып барыгыз.

 Механик һәм агротехник чаралар

Юк итү: Паразит белән зарарланган үсемлекләрне тамыры белән йолкып алыгыз һәм яндырыгыз. Әгәр повилика үсемлеккә ябышкан икән, аны сак кына аерып алыгыз. Бер генә кисәген дә калдырмагыз!

Утильләштерү: Җыелган үсемлекләрне герметик савытка салыгыз, киптерегез һәм яндырыгыз яки 50 сантиметр тирәнлектә күмегез.

Агачларны саклау: Әгәр паразит агач яки куакны нык урап алган булса, сабакларын җентекләп җыеп алыгыз. Моны эшләү мөмкин булмаса, зарарланган үсемлекне бөтенләй алып ташларга туры киләчәк.

Туфракны эшкәртү: Иртә язда яки көз көне су сибү орлыкларның тизрәк шытуына китерә, бу исә аларны юк итүне җиңеләйтә. Чәчү әйләнешен саклагыз, җирне тирән сөрегез.

Химик чаралар

Гербицидларны бары тик регламент буенча гына кулланыгыз.

Исегездә тотыгыз: гербицидлар үсеп торган үсемлекне генә үтерә, туфрактагы орлыкка тәэсир итми. Шуңа күрә эшкәртүне берничә ел дәвамында кабатларга кирәк.

Төп киңәшләр

Системалы эш: Бер генә метод җитәрлек түгел, аларны комплекслы кулланыгыз.

Күршеләрне күзәтегез: Повилика межаларда яки читтә барлыкка килсә, аны шунда ук юк итегез, югыйсә ул тиз арада сезнең бакчага күчәчәк.

Чәчәк аттырмагыз: Иң мөһиме — паразитның орлык бирүенә юл куймагыз. Сизү белән үк юк итегез!

Рәүзәнә Хаматнурова, Балтач районы буенча «Россельхозцентр» филиалының баш агрономы