Көнтүгештә “Каз өмәсе”!

“Бүген Ришат белән Фидаия Хәйруллиннар үз ихаталарына “Каз өмәсе”нә җыйдылар. Ел саен 100 баш кош- корт асраган бу уңганнарның казлары искиткеч зур булып үскәннәр. “Ришатыма Рәхмәт, мин эштә, бар мәшәкате  аңа төште”, — ди хуҗабикә. Афәрин, Ришат, бик яхшы караган, күпме байлык! Исән - сау булып, хәерле ризыкларына язсын. Рәхәтләнеп кунак булып, бәйрәм итеп кайттык. Күмәк эшкә ни җитсен?! Шулай бердәм гомер итәргә язсын! Киләсе елга да җыелышып өмәгә килербез, дигән өмет белән таралыштык”, — ди Көнтүгеш авыл мәдәният йорты каршындагы ”Аманат” фольклор төркеме җитәкчесе, авылда мәдәни чараларны оештыручы Асия Мостафина.

Симез булып үскән казларны җырлый-җырлый тазарткан аманатчылар ап-ак түшкәләрне Хәйруллиннар капкасы алдыннан чишмә кебек чылтырап аккан Кече Мата (Көнтүгеш) елгасы суында чайкадылар.

Кош-кортны күпләп асраган хуҗалар бар Көнтүгештә. Хәйруллиннар үрнәгендә алдагы елларда да күңелле “Каз өмәләре” гөрләр. Дөньялар гына тыныч булсын!