Гөлназ Асаевага һәм аның төркеменә аю һөҗүм иткән

Башкортстанның атказанган артисты Гөлназ Асаева интернет челтәрләрендә видео белән уртаклашты: пикник вакытында аларның командасына аю һөҗүм иткән.

Җырчы команда белән табигатьтә ял итәргә карар кылулары турында сөйләде. Бөтен кирәк-яракны җыялар да чыгып китәләр. Утта яшелчә һәм ит кыздыралар, гитарага җырлар җырлыйлар. Шуннан соң аларның лагерена таба аю йөгерүе видеога эләгә.

Мөгаен, аны шау-шу һәм ризык исе җәлеп иткәндер. Кадр артында: "Качыгыз!" дигән сүзләр ишетелә. Зыян күрүчеләр дә бар. Җырчының бер фотосында ир-ат ашыгыч ярдәм машинасында утыра - аның күлмәге канга баткан. Мөгаен, бу җырчының концерт директоры Вадим Фәтхинуровтыр. Ул хәзер ни хәлдәдер, билгесез, социаль челтәрләрдә җырчы башка берни дә куймады. Ул команда белән кайда ял иткәне дә әлегә билгесез.