Башкортстанда ел башыннан янгыннар 89 кешенең гомерен өзгән...

Быелның 111 көнендә Башкортстанда 1855 янгын теркәлгән, аларда 89 кеше, шуларның 7се балалар һәлак булган. 54 кеше төрле җәрәхәтләр алган, 377 кеше янгын сүндерүчеләр тарафыннан коткарылган, дип хәбәр иткәннәр БР буенча гадәттән тыш хәлләр министрлыгы матбугат хезмәтендә.

Ведомство мәгълүматлары буенча, узган атнада гына да, 14-20 апрельдә, 260 янгын терәлгән, аларда 8 кешенең гомере өзелгән, 6сы җәрәхәтләнгән. Узган төндә 4 кеше һәлак булган. Янгыннар Стәрлетамакта һәм Мәләвез районының Нөгеш авылында баш калкыткан. Кешеләрнең үлеменә китергән янгыннарның иң еш сәбәпләре — ут белән саксыз эш итү, шул исәптән тәмәке тартканда, электр җиһазларын эксплуатацияләү кагыйдәләрен бозу.

Ут белән сак эш итегез!

Автор:Аида Хайртдинова

Читайте нас

Редакцияне сайлау