Балтачлылар! Салымнарыгыз түләнгәнме?

«Опоры России» ның Мәскәү шәһәр бүлегенең салымнар комитеты рәисе Павел Зюков 1 декабрьдә физик затлардан алына торган өч мөһим салымны — җир, транспорт һәм милек салымнарын түләү вакыты тәмамлануы турында сөйләгән. Аның сүзләрен RT китерә.

Белгеч җир салымын җир кишәрлекләре хуҗалары түләргә тиешлеген ачыклаган, аларга ярдәмче хуҗалык алып бару өчен җирләре булган гражданнар да керә. Зюков сүзләренчә, салым ставкасы кадастр бәясенең 0,3 процентын тәшкил итә, әмма төбәк хакимиятләре аны киметү хокукына ия.

Комитет рәисе мондый ставканың торак фонды астындагы җирләр, авыл хуҗалыгы, шулай ук дача ширкәтләре җирләре өчен кулланылуын өстәгән. Калган очракларда салым кадастр бәясенең 1,5 процентын тәшкил итә, дигән ул.

Транспорт салымы турында сөйләгәндә, эксперт бердәм ставка юк дип билгеләп үткән. Ул искәрткәнчә, Россиянең һәр субъектында әлеге салымның үз ставкалары гамәлдә, әмма күпчелек очракта алар Салым кодексында билгеләнгән ставкалардан 10 тапкырдан артык аерыла алмый.

Зюков сүзләренчә, ставка транспорт чарасының төренә, аның бәясенә, шулай ук моторның куәтенә бәйле. Ул бу салымны түләүдән 70 ат көченә кадәр автотранспорты булган машина йөртүчеләр, социаль яклау органнары аша автомобильләр алган инвалидлар, беренче һәм икенче төркем инвалидлар, шулай ук ташламалыларның башка категорияләре азат ителүен өстәгән.

"Милек салымы-гражданга караган күчемсез милек белән түләнә торган салым. Аны исәпләү өчен нигез булып Росреестр сайтында карарга мөмкин булган кадастр бәяләмәсе тора", - дигән эксперт.