Күп балалы аталарны иртәрәк пенсиягә чыгару турында тәкъдим каралачак

Русия президенты Владимир Путин күп балалы аталарны вакытыннан алда пенсиягә чыгару турындагы тәкъдимне Министрлар Кабинетына эшләргә кушачагы турында вәгъдә итте. Бу хакта РИА Новости сайтында хәбәр ителә.

Бу тәкъдим "Ата-ана даны" орденын алган күп балалы гаиләләр белән очрашуы вакытында яңгырады.

"Һичшиксез карарбыз, – диде дәүләт башлыгы. –  Хөкүмәткә эшләргә йөкләмә бирермен".

Шулай ук әлеге очрашуда Владимир Путин "Герой-ана" исемен кире кайтару турындагы инициативаны хуплады һәм бу исемгә лаек булучыларга бер тапкыр 1 миллион сум акча түләргә тәкъдим итте.