Балтачта чистарту өмәләре дәвам итә

Бу көннәрдә район үзәгендәге барлык учреждение, предприятие, оешма эшчәннәре бердәм күтәрелеп чистарту өмәләренә чыкты.

Яз җитеп, кар эри башлау белән кар астыннан ташландык чүп-чар өемнәре чыга. Балтач районында һәр язда чистарту, тазарту өмәләре оештырыла. Иске Балтач почта элемтә бүлекчәсе һәм “Яшьлек” физкультура-савыктыру комплексы эшчәннәре бүген, 15 апрель иртәсендә үзләренә беркетелгән территориягә өмәгә чыктылар. Урамнарда, юллар кисешкән урыннарда, юл буйларында тәрбиясез юлчылар, авылдашларыбыз ыргыткан чүп-чарны җыеп чыгаруны, территориядәге кар өемнәрен таратуны оештырдылар.

Чистарткан җирдә түгел, чүпләмәгән җирдә чиста дип кабатларга яртасак та, калдыкларны, чүп-чарны тиешсез урынга ыргытабыз шул. Артыбыздан без ташлаган чүпне кемдер килеп тазартырга түгел, аяк баскан, үзебезне туендырган җирне пычратмаска тиешбез.

Газим Талипов фотолары