Татлы камырдан балан бәлеше

Бу камырны кулланган хуҗабикә балан бәлешен гел шушы рецепт буенча пешерә.

Камыр өчен: 50 грамм маргарин, бер уч шикәр комы, 1 йомырка, 2 аш кашыгы каймак, ике аш калагы майонез, 4 аш кашыгы үсемлек мае, бер чеметем тоз, 1 чәй калагы камыр кабарткыч, чама белән он.

Он өстенә угычтан маргарин, шикәр комы, камыр кабарткыч салып кул белән уабыз. Шул масса өстенә калган ингредиентларны салып камыр басабыз.

Эчлек өчен: 2,5 чәшке (кофе чәшкесе) шикәр комы, 1 чәшке он, 1 чәшке крахмал.

Камырны бик юка итми җәеп табага салабыз. Камыр өстенә бер кат шикәрле-крахмаллы катнашма, аннары баланны һәм калган кушылманы җәеп бетерәбез. 
Духовкада, 40 минут чамасы пешерәбез.

Бу камырны алма пирогына да кулланырга була.

Чәйләрегез тәмле булсын!

Чыганак: intertat.tatar