Түбән Карыш авылында “Нәүрүз бәйрәме” үтте!

Түбән Карыш авыл мәдәният йортының “Умырзая” фольклор коллективы халыкны “Нәүрүз бәйрәме”нә җыйды.

Бу бәйрәмгә бай һәм үзенчәлекле программа әзерләнгән иде. Чара барышында төрле конкурслар, уеннар үткәрелде, алар концерт номерлары белән чиратлашып барды. Бәйрәмгә Яз-Нәүрүзбикә һәм Кыш бабай килде. Алар команда җыйдылар һәм үзара ярыштылар: Кыш бабай бирешергә теләмәде, ә көче аз калды, чөнки урамда җылы, язгы кояш балкый. Берничә ярыштан соң Кыш Бабай язга үз урынын бирде. Баштан ахырына кадәр бәйрәм кәефе хөкем сөрде. Чара ахырында коймак һәм милли татар ризыклары белән чәй эчү оештырылды. Мондый фольклор бәйрәмнәр халыклар арасында дуслыкны сакларга ярдәм итә, йола бәйрәмнәренә мәхәббәт һәм кызыксыну тәрбияли.

Лилия Фәүзетдинова, мәдәни чараларны оештыручы