Балтачлылар төбәкара бәйгедә катнаша

Иске Балтач. 13 октябрь - "Балтач таңнары". Иске Балтач   икенче санлы урта мәктәбе театр коллективы  халык театрларының Шамил Закиров исемендәге «Идел-йорт» төбәкара бәйгесендә катнаша

Иске Балтач  икенче санлы  урта мәктәбе  театр коллективының чыгышы  Шамил Закиров исемендәге «Идел-йорт» төбәкара театр коллективлары конкурсына тәкъдим ителде.   Жюри хөкеменә  коллектив драматург  Наил Гаетбаевның "Кызлар килде авылга"комедиясен тәкъдим итә. Сайлап алу туры онлайн форматта уза.

Фестиваль-конкурсны  Татарстан Республикасы Мәдәният министрлыгы, Бөтендөнья татар конгрессы Башкарма комитеты,   Г. Камал исемендәге татар дәүләт академия драма театры, Татарстан  Республикасы  традицион мәдәниятне үстерү үзәге оештыра.

Балтачлыларның «Идел-йорт» конкурсында катнашуы беренче генә тапкыр түгел. 2012 елда  “Балкыш” район халык театры бәйгенең Яр Чаллыда узган төбәк этабында Рәшидә Җиһаншинаның “Кодагыйлар” комедлиясе белән чыгыш ясаган иде. Ә  узган елда районның театр коллективы  Әнгам Атнабаевның  “Балакайларым” комедиясе белән онлайн-форматта чыгыш ясап прирзлы урынга лаек булган иде.

Бәйгедә катнашучы  Иске Балтач   икенче санлы урта мәктәбе театр коллективына уңышлар телибез.