“Зөлфия” Мәскәүне яулады: Балтач биючеләре халыкара сәхнәдә җиңү яулады!

Мәскәү шәһәрендә узган “Мәскәү талантларга ышана” Халыкара иҗади фестиваль-конкурсында Башкортстан Республикасының атказанган мәдәният хезмәткәре Раушания Хәсәнова җитәкчелегендәге “Зөлфия” үрнәкле бию ансамбле үзенең югары осталыгын тагын бер кат раслады һәм I дәрәҗә Лауреат исеменә лаек булды. Бу җиңү – ансамбльнең тырыш хезмәте, иҗади эзләнүләре һәм бию сәнгатенә чиксез мәхәббәтенең нәтиҗәсе!

“Зөлфия”леләр Мәскәү сәхнәсендә генә җиңү яулап калмады, ә махсус диплом белән дә билгеләнде. Жюри әгъзалары ансамбльнең репертуарының байлыгын, биюләрнең милли колоритын, костюмнарның матурлыгын һәм башкару осталыгын югары бәһаладылар.

Билгеле булуынча, “Зөлфия” ансамбле - Балтач районының горурлыгы. Алар республикада гына түгел, ә аннан читтә дә танылу алган коллектив. Ансамбльнең һәрбер чыгышы – тамашачылар күңелендә онытылмас тәэсирләр калдыра торган чын сәнгать әсәре!

Әле күптән түгел генә “Зөлфия”леләр Уфада үткән “Брависсимо” Халыкара балалар һәм яшүсмерләр иҗаты конкурсында җиңү яулаган иделәр. Бу җиңүләр ансамбльнең иҗади потенциалының чиксез булуын, аларның яңадан-яңа үрләр яуларга әзер булуын күрсәтә!