Гаилә уеннары күңелле һәм онытылмаслык булды

Бүген, 3 гыйнвар көнне, Матада бар авылны гөрләтеп Яңа ел гаилә уеннары үтте.

Бу ярышлар балаларның һәм ата-аналарның көчен һәм җитезлеген сынау гына түгел, ә һәр команданың бердәмлеге күрсәткече дә булды. Олыларның балалар белән беррәттән ярышларда катнашып, бар мәшәкатьләрен онытып балачакка кайтуларын  күрү – үзе бер куаныч.

Мондый чаралар ата-аналарны һәм балаларны якынайтып, бердәмләштереп  кенә калмый, ә яшь буынга чын гаилә кыйммәтләре турында күзаллауларны да бирә, яшьләрне сәламәт яшәү рәвешенә җәлеп итә. Ачык һавада хәрәкәтчән уеннар һәм күңел ачулар барысына да зур шатлык китерде. Мондый күңелле чарадан , саф һавадан халыкның озак тараласы килми торды.

Кызыклы һәм чагу бәйрәмне оештыручы авыл клубы мөдире – Эльвера Солтановага авыл халкы чиксез рәхмәтле.

Бу көнне гаиләләр алган күтәренке кәеф һәм бик күп уңай тәэссоратлар алар белән озакка калыр, дип ышанасы килә.