“Корал һәм каләм белән” марафонында

Башкортстан Республикасы журналистлары берлегенең төньяк районара иҗади берләшмәсе Бөек Җиңүнең 80 еллыгына багышланган “Корал һәм каләм белән” марафонын оештырды. Бу  атнада чараТәтешле районы редакциясендә оештырылды. Хезмәттәшләребез кунакларны якты йөз, Бөек Ватан сугышы вакыты җырлары белән  ил тарихының җитди чорына алып кайттылар. Бөтенрусия патриотик җыр конкурсында җиңүче  гәзитнең актив авторы, махсус хәрби операциягә үз теләге белән барып хезмәт итеп кайткан Олег Миңнегалиевның чыгышы уйланырга, бүгенге көннең кадерен белергә әйдәде сыман.

Туган-якны өйрәнү музеенда очрашу эчтәлекле һәм фәһемле булды.

“Балтач таңнары” гәзитенең баш мөхәррире Рөстәм Вәлиев чарада   "Тәтешле хәбәрләре" гәзите редакторы Рәфит Фәйзрахмановка марафон штандартын тапшырды.

Төньяк районара иҗади берләшмәсе рәисе Ирина Вәлиева үз чыгышында мондый чаралар тәҗрибә уртаклашу йөзеннән әһәмиятле булуын сызык өстенә алды.

Тәтешле районында  туган шәхесләр республикада гына түгел, ә илдә дә зур танылу алган. Шундыйларның берсе-Хания Фәрхи музеенда аралашу дәвам итте.Татар моңын илдә, дөньяда таныткан шәхеснең иҗат юлы белән таныштык.

 Илһамлы төбәктә иҗат кешеләре аралашып кайтуына тиң булды бу очрашу.