Күпләребез тирә-якта чүп-чар өелеп ятуга, кирәк-яракларга бәяләрнең артуына зарлана. Ә менә Түбән Иванай авылында яшәүче йорт хуҗабикәсе Марина Давлетбаева ике дә уйламый, бу проблемаларны берьюлы хәл иткән — буш пыяла шешәләрдән... теплица төзегән.
—Шешәләрне чүплектән дә җыйдым, авылдашлардан да алдым. Өч улым да ярдәмләште. Өч метрга-дүрт метр зурлыктагы теплица килеп чыкты. Түбәсен поликарбонаттан яптык. Беренче елдан ук утырткан барлык яшелчәләрем уңды. Җылылык та, яктылык та тәэмин ителгән шартларда үскән уңыш ел әйләнәсенә җитте, — ди уңган хуҗабикә.