Барлык яңалыклар
Tөрлесеннән
6 февраль 2018, 22:52

Ялангачта сыналган технология белән алга баралар

Терлекчелек тармагында сыналган технология буенча уңышлы эшләп килгән "Восток" җәмгыяте былтыр продукция җитештерүдән 5 миллион 476мең 536 сум күләмендә саф табыш алган..

Соңгы елларда терлекчелек тармагында классик технология буенча эшләгән хуҗалыклар сирәгәя бара. Сер түгел, яңа технологияләр үзләштерелеп, җитештерү процессына механикалаштыру ныграк үтеп кергән саен авыл үз тормышыннан ераклаша барган сыман. Кулга сәнәк тотып яки җигүле ат ярдәмендә эш башкара торган заман түгел дип, ничек кенә булмасын, кыйммәтле техника сатып алу ягын караган хуҗалыклар бар. Бер үк вакытта сыналган технология буенча эшләп нәтиҗәлелек тәэмин иткән хуҗалыклар да юк түгел.
Шуларны уйлаганда, “Восток” җәмгыяте авыл кешесенең мәшгульлеген ныклап торып тәэмин иткән предприятиеләрнең берсе дип әйтергә мөмкин. Рәдиф Нуриманов җитәкчелек иткән Ялангач сөтчелек фермасында бүген егермегә якын терлекче эшли. Ирина Захарова, Нина Бикмурзина, Гүзәл Фәйзуллиналар иллешәр сыер сава. Терлекче Владик Фәйзуллин, Ефим Каликаев, Илдар Яндубаевлар җигүле ат ярдәмендә савым сыерлары “өстәл”ен әледән-әле азык белән тулыландырып тора. Көндез утарда тотылган маллар алдында күләмле азыкларның чиге юк. Терлекчеләр рационда каралган азыкларның барысын да маллар алдыннан өзмәскә тырыша. Һәр сыер исәбенә 20-25 килограмм сусыл азыклар, 4 килограмм он бирәләр. Сөтбикәләргә чүпрә ясап та эчерәләр.
—Маллар организмында шикәр-протеин нисбәтен көйләү өчен рационга саф шикәр дә кушарга уйлап торабыз,— ди мөдир, фермада малларны тукландыру үзенчәлекләре белән таныштырып.
—Әлеге вакытта тулай савымның бер өлешен нәкъ шул таналар тәэмин итә. Инде барысы да үрчем китерде дип әйтерлек, —ди ферма мөдире Рәдиф Нуриманов, савым сыерлары көтүен яңарту гына тармакны алга илткәнлеген ассызыклап.
Сыналган технология буенча эшләгән Ялангач сөтчелек фермасы былтыр 4737 центнер сөт җитештерде. Продукция җитештерүдән 5 миллион 476 мең 536 сум күләмендә саф табыш алганнар. Әлеге вакытта тоннага якын күләмдә көнлек тулай савымга ирешәләр.
Читайте нас в