Актанышта исерек үсмерләр төркеме полиция хезмәткәрен кыйнаган

Бу хәл 27 гыйнвар көнне Актаныш районы үзәгендә булган. Җәмәгать урынында яшьләр төркеме тавышлануы турында район эчке эшләр бүлегенә хәбәр иткәннәр. Хәбәр булган урынга полициянең төбәк инспекторы килгән. Тик анда беркемне дә очратмаган. Шулай да хәбәр булган урыннан ерак түгел, исерек хәлдәге үсмерне күреп калган. 17 яшьлек үсмерне, полиция хезмәткәре административ хокук бозу турында проткол төзү өчен, бүлекчәгә алып барырга уйлагач тегесе каршылык күрсәткән. Ул арада полиция хезмәткәре белән үсмер тарткалашкан урынга егетләр төркеме килеп җиткән. Мөгаен, алар барысы да шушы тирәдә тавышланган төркем хулиганнары булгандыр. Исерек яшьләр полиция хезмәткәрен кыйнап, вакыйга урыныннан качканнар. Шулай да бераздан кыйнаучыларның икесе кулга алынган. Полиция хезмәткәренең танавы сынган булып чыга.