Фәһемле семинар

 Чараны  үзәк район хастаханәсе баш табибы С.Гельметдинов ачты,  фикер алышу темаларының актуальлеген ассызыклады. Семинарның беренче өлешендә фельдшерлар укуларын билгеләнгән регламент нигезендә үттеләр. Котыру авыруын профилактикалау, талпан чакканда медицина ярдәме күрсәтү алгоритмы, эпидемиологик куркынычсызлык, цифрлаштыру мәсьәләләре кебек мөһим темалар тикшерелде. Фельдшерлар Т. Рубцова  (Курач ФАПы) һәм А. Камильянова  (Көмьязы ФАПы) үзләренең фельдшерлык пунктларының 2025 елдагы эшенә җентекле анализ ясадылар, төп күрсәткечләрне һәм казанышларны яктырттылар. Баш табибның медицина бүлеге буенча урынбасары Р. Хәбипова  җентекле анализ белән чыгыш ясады, игътибарны үлемне киметү чараларына юнәлтте. Участок терапевтлары 1 кварталда үз эшләрен анализладылар, шулай ук 2026 елның март аенда үлүчеләр санын анализлау һәм яман шеш очракларының башлануын бәяләү белән доклад тәкъдим иттеләр. Профилактиканың мөһим мәсьәләләренә дә кагылдылар. АПС мөдире А. Абрарова котыру авыруын профилактикалау турында сөйләде, ә табиб-невролог А. Әхкәмова  талпан кадалганда ярдәм күрсәтү алгоритмнары турында сөйләде. Семинар йомгаклары буенча 2026 елның 2 кварталына яңа бурычлар һәм максатлар билгеләнде. Чара тәҗрибә уртаклашу, көнүзәк проблемалар турында фикер алышу һәм  үзәк район хастаханәсе медицина хезмәткәрләренең һөнәри дәрәҗәсен күтәрү өчен кыйммәтле мәйданчык булды.