Балтач районында фельдшер-акушер пунктлары яңартыла

Районда фельдшер-акушер пунктларын яңарту өстендә максатчан эш алып барыла.

Районда фельдшер-акушер пунктларын яңарту өстендә максатчан эш алып барыла. Быел Штәнде авыл җирлегендәге Мата авылында фельдшер-акушер пунктының яңа бинасы ишекләрен ачкан иде. Җирлек карамагындагы янә бер авылда халыкка медицина ярдәме күрсәтү объектын төзү эшләрен җәелдерделәр. Бусы җирлек үзәге—Штәндедә.

Фельдшер-акушер пунктының яңа бинасы элекке авыл мәдәният йорты урынында калкып чыгачак.

Нефтекаманың “Энергострой” җәмгыяте эшчеләре бинаны күтәрә башлады да инде. Биредә 9,7х8,9 мет р зурлыгында капиталь объект төзеләчәк.Бинаның эчке ягы газ-бетон блоклардан күтәрелә, тышы керамик кирпеч белән йөзләнә. Ә аралыкта базальт плитәдән җылыткыч. Радик Шәрәфетдинов җитәкчелегендә эшләгән ташчылар: Ришат Харисов, Александр Шараповка объектның стенасын күтәреп, түбәсен ябу бурычы йөкләтелгән.

Көннәр эссе торуга карамастан, төзүчеләр эшне кызу тота.

Штәндедә фельдшер-акушер пункты булдыру максаты белән җәелдерелгән төзелеш эшләре районда “Авыл җирлекләрен тотрыклы үстерү” федераль программасы кысаларында тормышка ашырылучы объектларның берсе.