Түләүләр – аерым контрольдә

Премьер-министр белдерүенчә, көнкүреш калдыклары әйләнеше мәсьәләләрен хәл итүгә кагылышлы барлык вәкаләтләр Русия Табигатьтән файдалану һәм экология министрлыгында тупланган. Шулай ук, “Русия экология операторы” булдырылган, ул барлык төбәк операторлары эшчәнлеген контрольдә тотачак.– Әлегә барлык башлангычлар, үзгәрешләр тоткарлыксыз башкарыла, – диде Дмитрий Медведев. – Максат әлеге тармакны үзгәртеп корудан гына тормый, иң мөһиме – чүп-чар чыгару өчен хакларның нигезсез һәм кинәт күтәрелүен булдырмау. Әлеге теманы аерым контрольдә тоту кирәк, шул исәптән Монополиягә каршы федераль хезмәт тарафыннан да. Кайбер төбәкләрдә хаклы ялдагыларга, инвалидларга, күпбалалы гаиләләргә ташламалы тарифлар билгеләнде. Бу яхшы. Губернаторларга шушы тәҗрибәгә игътибар итүне сорар идем.

Дмитрий Медведев тирә-як мохиткә зыян салган өчен ставканы 2023 елга кадәр узган ел дәрәҗәсендә саклап калу турында боерыкка кул куюы турында хәбәр итте. Аның сүзләренә караганда, бу халык өчен тарифларны киметергә ярдәм итәчәк.

Дмитрий Медведев, шулай ук, арытаба контейнерларда тупланган чүп-чарның фактик күләменнән чыгып түләү системасына күчү кирәклеген белдерде.

– Һәр гражданга күпме чүп туры килүен билгеләү авыр, әлбәттә, әмма кешеләр артык акча түләмәсен өчен тырышырга кирәк, – диде Премьер-министр. – Бу – төп максат. Ул гади түгел һәм әлеге өлкәдәге барлык процессларга да аерым игътибар таләп итә.

Чыганак Кызыл таңнан.