Балтач яшьләре тәмәкедән баш тартырга чакыра

"Тәмәкегә юк!!!"акциясендә катнашучы яшьләр Иске Балтач урамнарында халыкны сәламәт яшәү образы алып барырга чакырып 200 дән артык буклет, листовка тараткан.

Тәмәке бик күп авыруларга башлангыч булып тора. Шуны истә тотып, Иске Балтачта “Тәмәкегә юк!!!” акциясе оештырдылар. Профилактик чара узган атнадагы Халыкара тәмәкегә каршы көрәш көненә багышланды.

Бу көн 31 май көнендә билгеләнә. Тәмәкедән баш тарту көнендә мәктәп укучылары көйрәтүнең сәламәтлеккә зыяны турында стена гәзитләре чыгаралар, плакатлар ясыйлар, сигаретсыз да яшәп булганлыгы турында үзләреннән өлкәннәргә аңлатырга тырышалар.

Акция барышында үсмерләрнең “Романтик” клубында тәрбияләнүчеләр, республика ирекмәннәр үзәге активистлары белән берлектә, Иске Балтач урамнарында халыкны сәламәт яшәү образы алып барырга чакырып 200 дән артык буклет, листовка тараттылар. Акциядә егермедән артык активист катнашты.