Райондашыбыз Светлана Галиева Хәния Фәрхи истәлегенә үткән I Төбәкара бәйгедә — икенче

Республика Халык иҗаты үзәге яклавында Тәтешле районы Хакимияте оештырган конкурс Татарстан Республикасы Халык артисты, эстрада җырчысы, актриса һәм композитор Хәния Фәрхи истәлегенә багышланды һәм ул “Онытылыр димә...” дип аталды.

Яраткан җырчының истәлеген мәңгеләштерү, башкорт, татар җыр сәнгатен үстерү максатыннан оештырылган чарада райондашыбыз Светлана Галиева да катнашты һәм икенче урын яулап кайтты.

—Конкурс 2 этапта үтте. Беренче этапка 2 җыр башкарып видеоязма җибәрергә кирәк иде. Беренче этапка 200 кеше видео җибәргән, шулар арасыннан 56 кеше икенче этапка үтте. Икенче этап (сайлап алу туры) сәгать 11дән кичке бишкә кадәр дәвам итте. Өченче этапка (финал турына) 23 кеше үтте, кичке сагать 8дә матур концерт башланды һәм аның барышында җиңүчеләр билгеләнде. 23 кеше арасында мин 2нче урын алдым, — дип хис-кичерешләрен уртаклашты Светалан ханым. — Шунысын да әйтим, конкурс һөнәри башкаручылар һәм үзешчән башкаручыларга бүленде. Мин үзешчән башкаручылар категориясендә, 20-35 яшькә кадәр башкаручылар арасында 2нче урын дипломанты булдым.

Афарин, Светлана ханым! Мәртәбәле бәйгедә район данын яклап чыгыш ясаган һәм җиңү яулаган моң иясенә тагын да зуррак уңышлар юлдаш булсын!