Балтачта “Тәмле ашлар җырчысы” белән очраштылар

Бүген Балтач үзәкләштерелгән район китапханәсенең уку залында, иҗат сөюче гүзәл зат вәкилләре катнашлыгында, язучы, шагыйрә Венера Мәҗитова иҗатына багышланган “Тәмле ашлар җырчысы” дип аталган очрашу үтте

Бүген Балтачның иҗат сөюче гүзәл зат вәкилләре үзәкләштерелгән район китапханәсенең уку залында язучы, шагыйрә Венера Мәҗитова белән очрашуга җыелды.

“Тәмле ашлар җырчысы” дип аталган чара язучының әле күптән түгел генә “табадан төшкән” “Өй ашлары”, “Хуҗабикә” китапларын презентацияләү сыйфатында үтте.

Китапханә хезмәткәрләре Венера Мәҗитова иҗатына багышланган күргәзмә әзерләгән иде. Очрашуда язучының тормыш, иҗат юлы белән якыннан таныштылар. Аның иҗатына багышланган электрон презентация дә күрсәтелде. Венера Мәҗитов сүзләренә язылган җырлар яңгырады.

Очрашу ахырында китапханә директор Лилия Хөсәенова, рәхмәт хисләрен җиткереп, Венера Мәҗитовага чәчәкләр тапшырды. Очрашу истәлеге итеп язучы белән бергә фотога төштеләр.

Читайте нас