Иске Балтач авылының ПМК ихатасындагы Сосновский балтырганы юк ителде

Җәмгыять директоры Айдар Әгъзамов, урыслар әйтмешли, хәлгә карата шундук дөрес реагировать итте.

—Кичә, 25 июль көнне, ихатада агулы үсемлек үсүе турында хәбәрне алгач, кичен егетләр белән барып үсемлек сабакларын чабуны оештырдык. Сабаклар сусыл, шундук яндырып булмау сәбәпле, ике көн кипкәнен көтү дөрес булыр дип уйлаштык. Шимбә көнне анысын да оештырачакбыз. Ә сабагы киселгән урыннардан үсемлекнең тамырына уксус кислотасы сиптек. (Монысын белгечләр киңәш итте). Бу үсемлекнең агулы икәнен белгән булсак, без аны күптән юк иткән булыр идек, — диде Айдар Рафаэль улы.

Иң мөһиме, агулы үсемлекнең арытабан таралуына юл куелмады. Районда яшәүчеләр, кайткан кунаклар, табигатькә чыкканда шушы үсемлеккә юлыккан очракта аны юк итү чарасын күрсеннәр иде.