Татарстанда үгез гөмбә җыючыларга һөҗүм иткән

Татарстанда үгез сөзеп кешеләрне һәлак итү очраклары моңа кадәр дә теркәлгәне бар иде. Ярсыган үгезләр былтыр сентябрь һәм ноябрь айларында Мамадыш районында --87, Биектау районында --85 яшьлек карчыкларның гомерен өзүе турында бәян иткән идек.

Бу юлы фаҗига Нурлат районы Каравыл Тавы авылы тирәсендә теркәлгән. Соңгы очракта чиктән тыш бәлагә таручы-- ир-ат.

5 июль көнендә үгез 62 яшьтәге ир-ат һәм хатын-кызга ташлана. Үгез сөзүеннән алган җәрәхәтләрдән ир-ат урында ук җан бирә. Кабыргалары нык сынган хатын-кыз хастаханәгә озатыла.

Башлангыч мәгълүматларга караганда, Якушкино авылыннан ирле-хатынлы ике кеше кырга гөмбә җыярга чыга. Икесе дә нык исерек булган. Бу вакытта көтүче елга аша сыер көтүен чыгарган. Бер үгез кинәт гөмбә җыючыларга ташлана. Хайванның агрессивлануына нәрсә сәбәпче булуы әлегә ачыкланмаган. Хәзерге вакытта тикшерү үткәрелә.

Чыганак: Интертат.