Бүген төбәк операторының махсус техникасы Иске Балтач авылында эшләде

Иске Балтач авылы урамнарына гыйнвар аенда калдыкларны туплау өчен махсус контейнерлар урнаштырылды.

Шәхси хуҗалыкларда шул тикле күп калдыклар барлыкка килә, көндез төбәк операторының махсус техникасы бушатып киткән контейнерлар төн үткәнче яңа партия калдыклар белән шыплап тулган була!

Кышкы айларда махсус техника ике-өч көн саен тупланган калдыкларны чыгаруны тәэмин итсә, соңгы атнада дүрт көн үтте. Бүген техника килеп көннең икенче яртысында контейнер урнаштырылган нокталарны йөреп чыкты. Иске Балтачның Южная урамында урнаштырылган өч контейнер калдыклар белән тулып ташып, чүп өемнәре контейнерларның кырыйларына өелгән иде. Төбәк операторы эшчәннәре тәүдә урам читенә өелгән өемнәрне, аннан соң гына контейнерларны махсус техникага бушатты.