+20 °С
Облачно
Җәмгыять
17 Июля 2020, 09:30
Балтачта кышка бүгеннән әзерләнәләр
Балтачның “Коммуналь хуҗалык” җәмгыятендә җылыту сезонына әзерлек эшләре җәелдерелгән.
Балтачның “Коммуналь хуҗалык” җәмгыятендә җылыту сезонына әзерлек эшләре җәелдерелгән.
—Җылыту сезоны тәмамлану белән җылылык тәэмин итү корылмаларын алдагысына әзерли башладык. Ремонт эшләре тулы куәтенә бара, — ди “Коммуналь хуҗалык” җәмгыятенең баш инженеры Роберт Әмирҗанов, эшләр барышы белән таныштырып.
Май аенда җылы җиткерү трассасын тикшереп чыкканнар. Иске Балтачның Комсомол урамында кырык метр озынлыкта торбаны алыштырырга туры килгән. Шулай ук эшермәләргә ревизия ясалган. Алар йөздән артык. Тузган алтысын яңага алыштырганнар.
—Оешмалардан җылыту системасын юып, басым белән тикшереп карау үткәрү өчен заявкалар килә башлады. Бу эшне өч оешмада башкардык та инде,--ди Роберт Әмирҗанов, сүзен дәвам итеп.
Район үзәгендә йөзгә якын объект “Коммуналь хуҗалык” җәмгыяте җылыту системасыннан файдалана. Моның исәбендә унтугыз күпфатирлы йорт. Кыш көнендә краннан су килмәсә яки ут сүнсә, түзәргә була, ә менә җылылык ягыннан өзеклек булса, бусы гадәттән тыш хәлгә барып тоташырга мөмкин.
“Коммуналь хуҗалык” җәмгыяте эшчеләренең бүген барлык тырышлыгы моңа юл куймауга юнәлтелгән.
Былтыр җәмгыятьнең бу тармагында капиталь ремонт үткәрелгән иде. Быел ремонт фронтында агымдагы эшләр генә каралган. Шулай да котельнаядагы барлык системаның корылмаларын карап чыкмый булмый. Чананы җәйдән әзерлә дигәннәр бит. Әлеге вакытта слесарьлар җылы су куа торган электр двигательләрен ремонтлау белән шөгыльләнә.
Шулай ук су белән тәэмин итү челтәрендә ремонт эшләре бара. Бу тармакта соңгы вакытта аварияләр еш күзәтелә. Тузган трассалар сафтан чыгып йөдәтә. Кайбер чакта атнага өчәр авария теркәлә икән. Шушы көннәрдә район үзәгенең Якутов урамында 65 метр озынлыкта торбаны алыштырырга туры килгән.
Проблемаларны әле хәл иткәндә кыш көннәрендә җиңелрәк булачагын яхшы аңлый “Коммуналь хуҗалык” җәмгыяте хезмәткәрләре.
Редакцияне сайлау
