Ак халатка юл — район дәваханәсендә башлана

Бүген сәламәтлек саклау өлкәсендә кадрлар мәсьәләсе аеруча әһәмиятле. Табиблар һәм урта медицина хезмәткәрләре җитмәү проблемасы ил күләмендә күтәрелгән чорда район дәваханәләренең яшь белгечләр белән эшләүгә җитди игътибар бирүе аеруча мөһим. Балтач үзәк район дәваханәсендә оештырылган чираттагы очрашу да нәкъ шул максатка — киләчәктә медицина өлкәсенә киләчәк яшьләрне район белән таныштыруга, аларда һөнәргә мәхәббәт һәм җаваплылык хисе тәрбияләүгә юнәлдерелде.

Күптән түгел Балтач үзәк район дәваханәсендә Башкорт дәүләт медицина университеты һәм Бөре медицина-фармацевтика колледжы студентлары белән очрашу узды. Практика үтү өчен килгән студентларны район дәваханәсе җитәкчелеге җылы каршы алды. Очрашу эшлекле рухта, шул ук вакытта ихлас әңгәмә форматында үтте.

Бирегә килгән студентларның күбесе дүртенче курсларда белем алучы яшьләр. Ә Бөре медицина-фармацевтика колледжы студент кызлары инде быел уку йортын тәмамлап, кулларына диплом алачак. Димәк, алар өчен бүгенге очрашу — киләчәк һөнәри юлларын билгеләүдә мөһим адымнарның берсе.

Балтач үзәк район дәваханәсенең баш табибы Салават Гыйльметдинов яшьләр белән аралашу барышында аларның һөнәр сайлау турындагы фикерләре белән кызыксынды, медицина өлкәсенә килү сәбәпләре турында сорашты. Бүгенге яшьләрнең уй-фикерләрен, максатларын аңлау — киләчәктә нәтиҗәле кадр сәясәте алып бару өчен дә әһәмиятле.

Очрашу вакытында студентларга район дәваханәсендә соңгы елларда башкарылган үзгәрешләр, яңарышлар турында сөйләделәр. Дәваханәнең заманча җиһазлар белән тулыландырылуы, пациентлар өчен уңайлы шартлар тудырылуы, белгечләр өчен эш мөмкинлекләре — боларның барысы да яшьләрнең игътибарын җәлеп итте.

Аеруча бүгенге көндә медицина учреждениеләрендә ихтыяҗ зур булган белгечлекләргә тукталдылар. Район дәваханәсендә яшь кадрларга кытлык сизелгән юнәлешләр турында ачыктан-ачык сөйләшү булды. Бу исә студентларга киләчәктә кайсы белгечлекләрнең аеруча кирәкле булуын аңларга ярдәм итә.

Салават Фаат улы яшьләргә медицина хезмәткәре һөнәренең җаваплылыгы турында да искәртте. Ак халат кигән кеше өчен белем генә түгел, сабырлык, кешелеклелек, пациент язмышына битараф булмау да мөһим икәнен ассызыклады. Район медицинасы исә аеруча фидакарьлек таләп итә торган өлкә. Чөнки авыл кешесе табибка өмет белән килә, аңа ышана.

Мондый очрашуларның әһәмияте зур. Практика вакытында студентлар медицина учреждениесенең эчке эшчәнлеге белән таныша, тәҗрибә туплый, коллектив мохитен күрә. Ә иң мөһиме — үзләренең киләчәктә кайда һәм ничек эшләргә теләүләрен күзаллый башлый.

Очрашу ахырында баш табиб студентларны уку һәм практика тәмамланганнан соң үзәк район дәваханәсендә хезмәт юлын башлау мөмкинлеген карарга чакырды. Район медицинасына яшь белгечләр килү ул халык сәламәтлеге өчен генә түгел, авылларның киләчәге өчен дә зур әһәмияткә ия.

Медицина — ул һөнәр генә түгел. Ул кешеләргә хезмәт итү, кеше гомерен саклау, өмет бүләк итү миссиясе. Ә мондый миссияне яшь, белемле һәм үз эшенә тугры белгечләр генә лаеклы дәвам итә ала.