Карыш игенчеләренең җиңнәре сызганулы

Югары Карыш. 27 март - "Балтач таңнары". Механизатор Рамил Вәлиев һәм Марат Вәлиев “Богдан” җәмгыяте игенчелек тармагының төп тоткасы бүген.

Җир һәм хезмәт бәясен  яхшы аңлаган, эшсөючән  механизаторлар эшләгән “Богдан” җәмгыятендә техника  ремонты фронтында  эшләр ахырына якынлаша.  Игенчеләр язгы кыр эшләрендә катанашчак соңгы тракторны  сафка бастыру өчен тырышлык сала. Бүген машина-трактор паркында төп эшләрне Рамил Вәлиев һәм Марат Вәлиев башкара. Сөял һәм май белән капланган куллары белән  могҗизалар тудыра алар. Әмма эш күп, һәм механизаторлар эшче куллар җитмәүчелегенә борчылу белдерә.

 "Элек   авыл хуҗалыгы колледжыннан студентлар ярдәмгә  килә иде. Бүген алар юк. Чөнки авылларда мәктәп яшендәге  балалар саны  елдан-ел кими бара. Без һөнәр училищесында укыганда, авылыбыздан гына да механизаторлыкка укучылар уннан артык иде", - ди Марат Вәлиев, җирле аграр секторның киләчәге турында борчылып.

Ә алда зур эшләр тора. Рамил Вәлиев язгы кыр эшләре чорында туфрак эшкәртәчәк, ә чәчү эшләре тәҗрибәле механизатор Марат Вәлиевка йөкләнгән.  

Бүген алар тырышлык салган Югары Карыш машина-трактор  паркы тирәсендә  солярка һәм металл исе аңкый. Ә игенчеләр күңеле өмет белән тулы.  Авырлыкларга карамастан, аграр сектор нык булачагына ышана алар.   

Димәк, «Богдан» җәмгыяте механизаторлары  хезмәтен  ныклык һәм өмет символы, дип әйтергә нигез бар. Бүген хуҗалык эшче кулларга кытлык кичерсә дә, игенчеләр  кыенлыкларны бергәләп җиңеп чыгу көченә ия. Чөнки алар күңелендә  аграр секторның киләчәге  бары тик үзләренең тырышлыгына  бәйле дигән ышаныч яши.