Балтачта яңа ФАПлар сафка баса

Балтач районы да әлеге үсеш процессы белән бергә бара. Яңа җиһазлар урнаштырыла, табибларның квалификациясе күтәрелә, медицина хезмәтләренең сыйфаты яхшыра. Бу исә халыкның медицина ярдәме белән канәгатьлеген арттыра.

 Соңгы елларда куанычлы күренеш күзәтелә - “Сәламәтлек саклау” милли проектының “Медицинаның башлангыч звеносын модернизацияләү” программасы чикләрендә  авылларда яңа заманча фельдшер-акушерлык пунктлары (ФАП) төзелә .

ФАПлар – авыл халкының сәламәтлеген саклау өчен бик мөһим объектлар. Алар беренче медицина ярдәме күрсәтү үзәге булып тора. Монда табиблар кабул итә, прививкалар ясала, беренчел тикшерүләр үткәрелә. Яңа ФАПлар авыл халкына сыйфатлы медицина хезмәтләреннән файдалану мөмкинлеген бирә. Тиз арада медицина ярдәме күрсәтү, авыруларны вакытында ачыклау һәм дәвалау, профилактик чаралар уздыру – вакцинация, тикшерүләр, халыкка сәламәт яшәү рәвеше турында мәгълүмат бирүдә аларның төп әһәмияте.

Яңа ФАПлар заманча җиһазлар белән җиһазландырылган, монда югары квалификацияле медицина хезмәткәрләре эшли. Бу исә авыл халкына югары сыйфатлы медицина ярдәме күрсәтү мөмкинлеген арттыра. Мондый үзгәрешләр – халыкның сәламәтлеген ныгытуда зур һәм бик тә кирәкле адым.

– Безнең дүрт миллионлы республикабыз өчен бу тема аеруча әһәмиятле, чөнки төбәк халкының өчтән береннән артыгы авыл җирендә яши. Мин районнар буйлап йөри башлагач, фельдшер-акушерлык пунктларының нинди генә биналарда урнашмавын күрдем, ә алар бездә барлыгы – 1 960. Мәсәлән, бер ФАП Бөек Ватан сугышы елларында хәрби әсирләр урнашкан баракта булган, икенчесе – гомумән XIX гасыр бинасында. Озак вакыт бу объектларга бөтенләй тиешле игътибар бирелмәде. Шуңа күрә без барлык иске ФАПларны алыштыру бурычын куйдык. Русия Президенты Владимир Владимирович Путинга беренчел звеноны комплекслы модернизацияләү программасын башлап җибәргәне өчен рәхмәтлебез, – диде Республика Башлыгы Радий Хәбиров үзенең бер чыгышында сәламәтлек саклауның беренчел звеносының матди-техник базасын ныгытуның мөһимлеге турында.

“Сәламәтлек саклау” милли проекты кысаларында районда 11 фельдшер-акушерлык пункты һәм 2 табиб амбулаториясе төзелгән. 2018нче елда Мата һәм Тутагач, 2020нче елда Сәйтәк, 2022нче елда асавка, Уразай, Түбән Иванай, Магашлы-Алмантай, 2023нче елда Түбән Карыш, Югары Кансөяр, 2024нче елда Көндәшле, Көмьязы, Иштирәк авылларында яңа заманча медицина биналары үз ишекләрен ачты. Әлеге вакытта Начар авылында яңа ФАП төзелә.

Районда ФАПлар төзелүе турында район үзәк дәваханәсенең баш табибы Салават Гыйльметдинов үз фикерен җиткерде:

—Балтач районы өчен яңа ФАПлар төзелү – халыкка күрсәтелә торган медицина ярдәменең сыйфатын күтәрүдә зур адым. Авыл җирендә ФАПның булуы беренче медицина ярдәмен вакытында күрсәтергә, авыруларны иртә стадиядә ачыкларга мөмкинлек бирә. Бу бигрәк тә еракта урнашкан авыллар өчен бик мөһим. ФАПлар шулай ук профилактик эшләрне активлаштыруда, халыкны сәламәт яшәү рәвешенә өндәүдә зур роль уйный. Бу программаның тормышка ашырылуында катнашкан һәркемгә рәхмәт әйтәсем килә. Шулай алга таба да халык сәламәтлеге өчен тырышып һәм бердәм булып эшләргә язсын.

Шулай итеп, бүген Балтач районында сәламәтлек саклау өлкәсендә зур эшләр башкарыла. Яңа ФАПлар төзелү – авыл халкына сыйфатлы медицина ярдәмен якынайтуда мөһим адым. Әлеге үзгәрешләр халыкның сәламәтлеген ныгытуга, тормыш сыйфатын яхшыртуга хезмәт итәчәк. Ары таба да бу юнәлештә актив эш алып бару, яңа проектларны тормышка ашыру – төп бурычларның берсе булып кала.

Фиргать НӘБИУЛЛИН.

Тиздән Начар авылында яңа ФАП үз ишекләрен ачар.