Җиде тапкыр СВО зонасында булган!

Бу хакта Башкортстанның Чиләбе өлкәсендәге вәкиле Әлфир Баемов социаль челтәрдәге сәхифәсендә язган.

“Чиләбедә яшәүче Бәйрәмбикә апа Хәмитова 84 яштә махсус хәрби операциясе зонасына 7 (‼) тапкыр барган.

Милләт рухлы апа чыгышы белән Курган өлкәсенең Сафакүл районыннан. Дөнья авырлыкларын күргән, 14 яшьтән тракторда эшләгән, ялгызы 5 баланы аякка бастырган.

Кызганычка каршы, 2023 елда улы Факил Хәмитов махсус хәрби операциядә батырларча һәлак булды. Шул чордан Бәйрәмбикә апа Донецк һәм Луганск халык республикаларында госпитальләрдә яткан егетләргә ярдәм күрсәтә.

7 декабрьдә ул тагын юлга чыга. Илсөярлек, тугрылык һәм батырлык сыйфатлары аңа ата-баба рухыннан киләдер. Ватандашыбызга ак юллар телик!" – дип язган Әлфир Баемов.

Фото: Баемовның шәхси аккаунтыннан