Россиядә яман шешкә каршы вакцина әзер

Галимнәр инде 2024 ел ахырында – 2025 ел башында ук яман шештән вакцинаның клиник сынауларына керешәчәк. РФ Сәламәтлек саклау министрлыгының баш онкологы, радиология фәнни-тикшеренү үзәге генераль директоры Андрей Капринга сылтама белән сроклар турында ТАСС хәбәр итә, дип яза Башинформ. “Клиникага кадәрге нәтиҗәләр инде алынган, димәк, сәламәтлек саклау министрлыгы һәм әхлак комитеты хуплавы белән беренче фаза һәм төркем җыюны без инде 2025 ел башында яки 2024 ел ахырында ук башлый алабыз”, - дип эксперт сүзләрен китерә агентлык.

Клиник тикшеренүләр кысаларында яман шештән яңа вакцина ала алачак Россиядә беренче булып меланома һәм вак күзәнәкле үпкә яман шеше булган кешеләр булачак, дип язды элегрәк «Башинформ».

Исегезгә төшерәбез, Каприн июль башында мРНК-технологияләр нигезендә онковакцина — бик перспективалы эшләнмә, дип белдергән иде. Аның асылы пациенттан шеш материалын алудан, аның үзенчәлекләрен анализлаудан һәм «шеш паспорты» булдырудан гыйбарәт, ул аннары персональләштерелгән вакцина өчен кулланыла.