Көндәшледә яңа ФАП ишекләрен ачты

Көндәшле. 4 сентябрь - "Балтач таңнары". Балтач районында быел төзелгән  фельдшер-акушер пунктларының икенчесе Көндәшле авылында файдалануга тапшырылды.

Башкортстанда яшәүче барлык халык, шул исәптән төпкел авылларда яшәүчеләр дә югары сыйфатлы медицина ярдәме алырга хокуклы. Моны тәэмин итүне  республика җитәкчелеге үзенең бурычы итеп куйды. “Сәламәтлек саклау” проекты  буенча быел гына республикада 131 ноктада  яңа фельдшер-акушер пунктлары төзеп, фадалануга тапшыру планлаштырылган.

Район җирлегендә “Сәламәтлек саклау” проекты чикләрендә  быел төзелгән ФАПларның икенчесе Көндәшле авылында  файдалануга тапшырылды.

Район хакимияте башлыгы Илгиз Субушев билгеләвенчә, Көндәшле авылында бердәм халык яши. Биредә урта мәктәп бар. Күмәк хуҗалыкны тернәкләндерү максаты да куела.

Көндәшледә совет чорында беренче ФАП 1936 елда төзелгән. 1956 елда бирегә Курачтан участок больницасы күчерелә.  Софья Уффри исемле хезмәткәр фельдшер  булып эшли. 1990 елда больницада яңа корпус файдалануга тапшырыла. Участок хастаханәсе 2009 елга кадәр эшли һәм егермегә якын авыл халкын хезмәтләндерә. 2009 елдан  больница көндезге стационар итеп үзгәртелә. Ә 2016 елдан  биредәге халыкка ФАП медицина ярдәме күрсәтә.

-Яңа фельдшер-акушер пунктында  халыкка  сыйфатлы медицина ярдәме күрсәтү өчен барлык шартлар җиткерелгән. Биредә кабул итү, прививка, процедуралар ясау кабинетлары бар,-диде тантананы алып баручы Айдар Сираев, “Сәламәтлек саклау” проекты  халык өчен эшләүгә юнәлтелгән булуын билгеләп.

Көндәшлелеләргә заманча Фап бүләк иткәннәре өчен тантанада авыл халкы исеменнән Нәфис Хәмәтнуров   республика, район җитәкчелегенә рәхмәт җиткерде.

Авыл халкы шатлыгын Көндәшле авыл җирлеге башлыгы Флүр Акберов,  үзәк район  больницасы  баш врачы Салават Гыйльметдинов, Башкортстан Республикасында Сәламәтлек саклыгы сферасына күзәтчелек  итү федераль хезмәте  территориаль органы җитәкчесе Динара Гашимова, Мәҗбүри  медицина  страховкалавы территориаль органы директоры Юлия Кофанова уртаклаштылар.

Тантанада Иштирәк фельдшер-акушер пункты  мөдире Зөһрә Слимова “Башкортстан Республикасы Сәләмәтлек саклау отличнигы” билгесе, Көндәшле ФАПы мөдире Алсу Зиннәтуллина Башкортстан Республикасы Сәламәтлек саклау мини  стрлыгы Мактау грамотасы белән бүләкләнделәр.