Башкортстанда эшсезләр саны кыскарган

Уфа. 22 май - "Балтач таңнары".  . Башкортстанда  агымдагы елның беренче кварталында эшсезләр саны   1,2 процентка кыскарган.

Беренче кварталда эшсезлек дәрәҗәсенең 1,2 процентка кимүе турында Башкортостанстат хәбәр итә. Аның мәгълүматлары буенча, 2023 елның 1 кварталында гомуми эшсезлек дәрәҗәсе 2,4  процент тәшкил иткән (2022 елның 1 кварталында 3,6 процент). Абсолют саннарда республикада эшсезләр саны 47,7 мең кеше тәшкил итә-бу узган ел белән чагыштырганда 30 процентка (21 меңгә) кимрәк. Искәртеп узабыз, республика халкының иминлеген яхшырту һәм ярлылыкны киметү "Демография"илкүләм проектының төп максатларының берсе булып тора.

- Безнең республикада эшсезлек буенча төп күрсәткечләр Россия буенча уртача күрсәткечтән түбәнрәк (3,5процент), Идел буе федераль округы субъектлары арасында Башкортостан Республикасы 3 нче урында тора. Күрсәткечләрнең уңай динамикасына хезмәт базарында киеренкелекне киметү буенча өстәмә чаралар ярдәм итә. Бу иҗтимагый эшләр дә, эштән азат ителү куркынычы астында булган эшчеләрне вакытлыча эшкә урнаштыру да, - дип комментарий бирә БР Гаилә, хезмәт һәм халыкны социаль яклау министры Ленара Иванова. - Әйтик, елның беренче 3 аенда дәүләт 5,8 мең кешене эшкә урнаштырганда эш бирүчеләргә финанс ярдәме күрсәтте.

Узган чорда 249 эш бирүче белән 319 миллион сумлык килешүләр төзелгән. Моннан тыш, быел оборона-сәнәгать комплексы предприятиеләрендә эшләүче һәм укучылар белән килешү төзелгән гражданнарның мәшгульлек үзәкләре аша эш эзләүче 870 хезмәткәрне һөнәри укыту планлаштырылган.

Республика халкының хезмәт активлыгын стимуллаштыру формаларының берсе булып республиканың эре эш бирүчеләре тарафыннан мәшгульлек хезмәте ярдәмендә даими рәвештә үткәрелә торган ачык кадрлар сайлап алу тора. Әйтик, заказлар һәм җитештерү күләме арта барган «Авангард» ФКП өчен ачык кадрлар сайлап алу нәтиҗәләре буенча, кадрларга ихтыяҗ да арта, компаниягә 420 кеше эшкә урнашу белән кызыксына, аларның 84е эшкә юллама ала, 27се әңгәмәгә чакырыла. Моннан тыш, уку йортларының чыгарылыш курсларының 40 студенты укуны тәмамлаганнан соң ук предприятиедә эш алачак бу хакта яклар ачык кадрлар сайлап алу мәйданчыгында да килештеләр. Шул ук форматта хезмәткәрләрне Уфа моторлар төзү производство берләшмәсе җыйган, мәйданга 550гә якын дәгъвачы килгән, шуларның 130дан артыгы – колледж студентлары.

- Республикада Ачык кадрлар сайлап алу форматында эшкә урнашуга ярдәм итү чаралары даими рәвештә-аена ике тапкыр үткәрелә. Аларда бер үк вакытта күп санлы хезмәткәрләр эзләүче эре эш бирүчеләр катнаша. Шул ук мәйданчыкта мәшгульлек өлкәсендә барлык хезмәтләрне мәшгульлек үзәкләре белгечләре бушлай күрсәтә, алар ярдәмендә урында резюме төзергә, һөнәри юнәлеш алуга тест узарга мөмкин. Әгәр теләгән белгечлек буенча эшкә урнашу өчен тиешле һөнәри әзерлек булмаса – сезгә дәүләт ярдәме белән бушлай ничек укырга кирәклеген әйтәчәкләр, – дип хәбәр итә БР Гаилә, хезмәт һәм халыкны социаль яклау министры Ленара Иванова.

Белешмә:

2022 елда хезмәт базарына ярдәм итүгә юнәлдерелгән өстәмә чараларны гамәлгә ашыру нәтиҗәсендә Башкортстанда 30 меңнән артык кеше  мәшгульлеген саклап калган яки эшкә урнаштырылган. Өстәмә чараларда катнашучы 1,5 меңнән артык эш бирүче үз чыгымнарын каплау өчен 1 миллиард 480 миллион сум акча алган. 2023 елда өстәмә чаралар түбәндәге юнәлешләр буенча гамәлгә ашырыла: эшсез гражданнар өчен иҗтимагый эшләр оештыру (мәшгульлек үзәкләрендә теркәлгән); эштән азат итү куркынычы астында булган хезмәткәрләрне вакытлыча эшкә урнаштыру; оборона-сәнәгать комплексы предприятиеләре хезмәткәрләрен һөнәри укыту.

Программада юридик затлар, шәхси эшмәкәрләр, дәүләт һәм муниципаль унитар предприятиеләр катнаша ала.