Балтачта “Коммуналь-хуҗалык” җәмгыяте эшчәннәре чистарту өмәсенә чыкты

Тәүге ике атнада алар үзләренең территорияләрен тазартсалар, бүген 10 апрель көнне, район үзәге Иске Балтач авлының үзләренә беркетелгән Сәнәгать зонасындагы 1,1 километр озынлыктагы юл буен ике яклап чүп-чардан арындырдылар.

Нинди генә калдыклар ташламаган узып баручылар юл буена?! Пластик, пыяла шешәләр, полиэтилен, калай, катыргы... Балалар бакчасы, мәктәп яшендәгеләрне әйләнә-тирә мохитне пычратмаска өйрәтеп тәрбияләсәк тә, өлкәннәр аңына бу әле булса барып җитми, күрәсең...

Өмәчеләр юл буена түшәлгән чүпләрне капчыкларга җыеп читкә чыгарды.

Юл буйлары өмәчеләр артыннан калдыклардан арынып, тазарып калды.