Башыгыз авыртса, аптырамагыз...

Бүген кич магнит давылы башланачак һәм иртәгә дә дәвам итәчәк. Бу хакта үзенең телеграм-каналында “Фобос” һава торышы үзәге белгече Михаил Леус хәбәр итә.

Хәбәрдән билгеле булуынча, бүген кич, Мәскәү вакыты белән 21.00 сәгатьтән соң, Җирдә бик көчле булмаган – G1 класслы – магнит давылы башлана. Җирнең магнитосферасының ярсу көче артачак. Ә җомга иртәсендә, Мәскәү вакыты белән 06.00 сәгатьтән соң, магнит давылы көчле – G3 класслы – булачак. Шуннан соң ул бер көчле, бер көчсез тирбәнешләр белән шимбә киченә кадәр дәвам итәчәк.

Белгеч билгеләвенчә, планетаның магнитосферасы киләсе атна башында гына тыныч хәлгә кайтачак.