Сөенче! 2022 елда яшәү минимумы да, минималь хезмәт хакы да артачак!

Президенты Владимир Путин 2022 елда яшәү минимумын 8,6 процентка, аена 12 654 сумга кадәр арттырырга, шулай ук минималь хезмәт хакын аена 13 890 сумга кадәр җиткерергә тәкъдим итте.

"Киләсе елга федераль бюджет проектында яшәү минимумын 2,5 процентка индексацияләү каралган. Әлбәттә, бу җитәрлек түгел, чөнки мондый параметрлар соңгы айларда тизләтелгән агымдагы инфляция дәрәҗәсеннән шактый калыша", - диде ул социаль мәсьәләләр буенча узган киңәшмәдә.

"2022 елга яшәү минимумының югарырак планкасын билгеләргә, инфляция белән чагыштырганда, аны узып киткән темплар белән, ягъни 8,6 процентка арттырырга тәкъдим итәм", - дип дәвам итте Путин.

Аның сүзләренә караганда, абсолют саннарда тулаем ил буенча яшәү минимумы бер мең сумга артырга тиеш.

Дәүләт башлыгы билгеләп үткәнчә, күп кенә социаль пособиеләр, шул исәптән балалары булган гаиләләргә түләүләр һәм социаль өстәмәләр, пенсияләргә өстәмә түләүләр дә яшәү минимумы күләменә бәйле.

"Шуңа күрә абсолют сан түгел, ә моның белән бәйле булуы мөһим. Ә аларны, исегезгә төшерәм, бу пособиеләрне миллионлаган гражданнар ала. Әлбәттә, бу түләүләр дә артачак", - диде ул.

Моннан тыш, Путин 2022 елда минималь хезмәт хакы күләмен арттыру турында төзәтмәләр әзерләргә кушты. Киләсе елда минималь хезмәт хакы 1100 сумга артачак һәм аена 13 890 сум тәшкил итәчәк.

Президент болай дип өстәде: "Россия Конституциясендә минималь хезмәт хакы яшәү минимумыннан ким була алмый, димәк, яшәү минимумы күләмен индексацияләү белән бер үк вакытта минималь хезмәт хакы да артырга тиеш. Киләсе елда шулай ук 8,6 процентка, абсолют саннарда якынча бер мең йөз сумга".

Путин билгеләп үткәнчә, бу карар күп гражданнарга кагыла. "Һәм эш бөтенләй абсолют зурлыкта түгел - эш шунда, МРОТ вакытлыча эшкә сәләтсезлек буенча пособиеләр исәпләү өчен кулланыла, шулай ук бюджет өлкәсендә, икътисад тармакларында хезмәт хакын билгеләүдә ориентир булып тора", - дип аңлатты дәүләт башлыгы.

Шуңа бәйле рәвештә, Президент администрациясенә 2022 елда яшәү минимумын һәм минималь хезмәт хакы күләмен арттыру турында төзәтмәләр әзерләргә кушылды. "Якын көннәрдә аларны Дәүләт Думасына кертәчәкмен һәм федераль бюджет турындагы закон проектын икенче уку барышында аларны хуплавыгызны сорыйм", - диде Путин.

Чыганак