Балтачта гошер сәдакасы җыю оештырыла

Иске Балтач авылының “Үзәк мәчете”ндә гошер сәдакасы җыю оештырыла.

Гошер ул зәкят сәдакасының бер төре. Аның да үз нисабы бар. Пәйгамбәребез (с.г.с.) бер хәдисендә: “Су сипми үстереп алган уңышның уннан берен, ә хезмәт куеп, су ташып сибеп үстерелгәннең егермедән бер өлешен сәдака итеп бирергә тиешбез”, – ди. Ягъни ун чиләк бәрәңгенең бер чиләге булып чыга.

Гошерне кемгә бирергә тиешбез?

– Фәкыйрь-мескеннәргә, ятимнәргә, авыру сәбәпле, үзе яшелчә үстереп ризыклана алмаучыларга бирә аласыз. Электән үк мәдрәсәләргә, дини гыйлем алучы шәкертләргә бирү гадәте дә бар. Авыл җирләрендә гошер сәдакасын җыюны мәчетләр оештыра һәм алар мәдрәсәләргә илтеп тапшыра. Гомәр радыйаллаһу ганһү үзенең бер вәгазендә, бөтен дөнья малын бер кашыкка тутырып кулыма бирсәләр, мин аны динне өйрәнүче бер шәкернең авызына салыр, ягъни ризыкландырыр идем, ди. Димәк, гошерне мәдрәсәләргә бирү дә зур саваплы гамәл булып тора, —ди “Үзәк мәчет” имам-хатибы Филүс хәзрәт Камалтдинов.

Гошер сәдакасы бәрәңгедән, шулай ук кишер дә, чөгендер дә, суган да сәдака була ала.

 Изге гамәлгә кушылырга теләге булганнар 11-12 сентябрь көннәрендә, сәдака өчен билгеләнгән ризыкларын “Үзәк мәчет”кә китерә алалар.