Гаиләнең алтын юбилее

Шул уңайдан Иске Балтач авыл биләмәсе башлыгы Данис Шакиров район үзәгендә яшәүче Винария Нурихан кызы һәм Рәфхәт Хәкимҗан улын ихлас тәбрикләде. Юбилярларга бүләк тапшырып җылы теләкләрен җиткерде. Ярты гасыр элек гаилә мөнәсәбәтләрен рәсмиләштергән аһәңле пар белән якынрак танышу форсаты бу. Вазифалы эшләрен уңышлы алып бару белән беррәттән, балаларын белемгә омтылырга, әйдәүче булырга өндәп тәрбиялиләр.

Гаилә башлыгы Рәфхәт Хәкимҗан улы ике югары белемгә ия. Башкорт дәүләт университетының тарих факультетын тәмамлаганнан соң төрле җитәкче вазифаларында көч сала. Мәктәп директоры урынбасары, ВЛКСМ район комитетының икенче секретаре, мәктәп директоры, КПСС район комитеты инструкторы, оештыру бүлеге мөдире, Балтач район халык мәгарифе бүлеге мөдире булып эшли. 1990—1995нче елларда халык депутатлары район Советы рәисе урынбасары була.

Ул  Башкортстан Республикасы Президенты каршында дәүләт хезмәте һәм идарәсе Башкорт академиясен отличие белән тәмамлый. Рәфхәт Әхкамов район мәдәният бүлеге начальнигы булып эшли.1997—1999нчы елларда Райсовет  рәисе урынбасары вазифаларын башкара.

Читтән торып Уфа дәүләт авиация-техник университеты аспирантурасын тәмамлый. Социологик фәннәр кандидаты Рәфхәт Хәкимҗан улы  белемен хезмәтендә куллана. Ары таба баш юрист, кадрлар бүлеге начальнигы, районның агросәнәгать комплексы хезмәткәрләре профсоюзы район комитеты рәисе, район Хакимиятенең информация-аналитик бүлеге начальнигы булып көч сала. Рәфхәт Әхкамов —Русия Федерациясе Хезмәт ветераны, Балтач районының Почётлы гражданины.

Гаилә башлыгының һәр башлангычын хуплаучы Винария Нурихан кызы шәфкатьле һөнәрне сайлый. Тик бераздан Бөре педагогия институтын тәмамлап балаларга белем бирә башлый. Ул Балтач район мәктәпләрендә укытучы булып уңышлы эшли.Винария Нурихан кызы —Русия Федерациясе Хезмәт ветераны.

Әхкамовлар ике улларын гаилә кыйммәтләренең кадерен белергә өндәп үстерәләр. Аларны хезмәт сөючән итеп тәрбиялиләр. Хәзер киленнәре Лариса Рафаил кызы һәм Гүзәл Рәмил кызы гаиләдә үз  балаларыдай. Уллары  икешәр югары белем алалар, районда җитәкче вазифаларында эшлиләр.  Өлкән һәм кече Әхкамовлар күп балалы гаилә. Винария һәм Рәфхәт Әхкамовлар алты оныклары казанышларына куанып яшиләр. Ике оныклары —Башкорт дәүләт медицина университеты студентлары. Уртанчылары Уфа  фән һәм технология университетының юридик факультетында белем ала. Өчесе дә мәктәпне алтын медальгә тәмамладылар. Мәктәптә тик яхшы билгеләргә өлгәшкән Азалия һәм Әмир —мәктәп укучылары. Әмир йөзү буенча җиде ел район чемпионы булып таныла. Ә кечеләре Таһир балалар бакчасына йөри.

Әхкамовларның дәвамчылары да өлкәннәре мисалында хезмәт сөю мохитендә тәрбияләнә. Алтын юбилей үткәргән гаилә өчен бу энҗе-гәүһәрләрдән дә кыйммәт.